شظايا العقل

    التاريخ يكتبه المنتصر (عادة بيبقى أسوأ وأحقر طرف)، بعد 10 سنين، 20، 50 سنة، لو عشنا، لو عاش حد من عيالنا إللي لسه ما جوش، لو فضل حد عايش في المخروبة دي، لو المخروبة دي فضلت أساسا على وجه البسيطة، حيتكتب إيه في كتب التاريخ؟! زورنا في تاريخنا الفرعوني والقبطي والإسلامي، زورنا في تاريخنا الحديث (وده كله تزوير وكدب وافترا ونخع ونفاق)، لما تتكتب كتب تاريخ للأولاد في المدارس بعد كده حيقولوا فيها إيه؟ مين إللي حينتصر وحيكتب روايته الكاذبة من التاريخ؟ الحقيقة نتمنى يبقى فيه حد عنده تنتوفة ضمير ويلغي كتب التاريخ الكبيرة والمجلدات الضخمة إللي بتهري كذب وضلال في الفاضي. ويُكتب فقط :" هذا وقد استحال الشعب المصري إلى طوائف متفرقة من الهمجيين البرابرة، فشلت معهم محاولات الأنسنة".